वडीगोद्री (जि. जालना): मराठा आरक्षणाच्या ५०० कोटींच्या कथित आर्थिक ऑफर आणि व्हायरल ऑडिओ क्लिपवरून पेटलेला राजकीय वाद दिवसेंदिवस अधिक तीव्र स्वरूप धारण करत आहे. शनिवारी (२४ ऑक्टोबर) अंकुशनगर येथील निवासस्थानी घेतलेल्या पत्रकार परिषदेत मराठा आरक्षण आंदोलनाचे नेते मनोज जरांगे पाटील यांनी पुन्हा एकदा सत्ताधाऱ्यांवर राजकीय बॉम्ब टाकला. "मराठा समाजाचे हक्काचे आंदोलन बदनाम करून कायमचे बंद पाडण्यासाठीच हे ५०० कोटींचे कटकारस्थान रचले गेले होते. आम्ही याचा पडदा आता पूर्णपणे फाडून टाकला असून, हा ५०० कोटींचा विषय आम्ही कोणत्याही परिस्थितीत संपू देणार नाही," असा थेट इशारा त्यांनी दिला. तसेच या गंभीर षडयंत्राची पाळेमुळे खणून काढण्यासाठी मुख्यमंत्री देवेंद्र फडणवीस यांच्यासह आता थेट देशाचे पंतप्रधान नरेंद्र मोदी यांनीही यात तात्काळ लक्ष घालावे, अशी आग्रही मागणी त्यांनी केली.
"आंदोलन मोडून काढण्यासाठीच एवढी टोकाची भूमिका का?"
पत्रकार परिषदेत संताप व्यक्त करताना जरांगे म्हणाले, "आम्हाला कोणत्याही नेत्यांशी राजकीय दावे-प्रतिदावे करण्यात अजिबात रस नाही. मात्र, मराठा आरक्षणासह दुष्काळग्रस्त शेतकऱ्यांचे ज्वलंत प्रश्न रस्त्यावर मांडल्यामुळेच आमच्याविरोधात एवढ्या टोकाची भूमिका घेऊन आम्हाला ५०० कोटी रुपये देण्याचा आणि बदनाम करण्याचा प्रयत्न का झाला, याचे उत्तर जनतेला मिळालेच पाहिजे." या प्रकरणातील सत्य बाहेर येण्याऐवजी ते दडपण्यासाठी दिल्ली दरबारी पडद्यामागून राजकीय हालचाली सुरू असल्याचा संशयही त्यांनी यावेळी व्यक्त केला. फडणवीस आणि शिंदे यांच्या पक्षातील लोक जर त्यांच्या परस्पर असे कारनामे करत असतील, तर ते भाजप आणि शिवसेना या दोन्ही पक्षांसाठी आत्मघातकी ठरेल, असा धोक्याचा इशारा त्यांनी दिला.
उदय सामंत किंवा शंभूराज देसाईंना चर्चेला पाठवा; सुरक्षेची हमी द्या
या प्रकरणाच्या मुळाशी जाण्यासाठी फडणवीस आणि शिंदेंनी स्वतः जबाबदारी स्वीकारून संबंधितांची कसून चौकशी करावी, असे आव्हान जरांगेंनी दिले. "संबंधित संशयित तुमच्याच पक्षातील असले, तरी त्यांना पाठीशी घालू नका. उद्योगमंत्री उदय सामंत, शंभूराज देसाई किंवा भाजपचे प्रदेशाध्यक्ष चंद्रशेखर बावनकुळे यांच्यापैकी कोणालाही चर्चेसाठी पाठवा, कोण पडद्यामागून काय करत आहे याची सर्व गोपनीय माहिती आम्ही त्यांना देऊ," असे ते म्हणाले. मात्र, ही सर्व माहिती देण्यापूर्वी संबंधित व्यक्तींच्या आणि साक्षीदारांच्या जीविताला कोणताही धोका होणार नाही, अशी लेखी व जाहीर हमी फडणवीस आणि शिंदे यांनी माध्यमांसमोर द्यावी, अशी महत्त्वाची अट त्यांनी ठेवली.
प्रसाद लाड, रामदास कदमांना थेट आवाहन अन् अटकेच्या मागणीवर सावध पवित्रा
भाजप आमदार प्रसाद लाड यांच्यावर निशाणा साधताना जरांगे म्हणाले की, "प्रसाद लाड यांनी आता पळवाट शोधू नये; आपल्या मैत्रीचा पश्चात्ताप होईल अशी वेळ त्यांनी आणू नये आणि या ऑडिओ क्लिपच्या मुळाशी जाऊन सत्य बाहेर काढावे." तसेच उदय सामंत व रामदास कदम यांच्या संशयास्पद वक्तव्यांचीही मुख्यमंत्र्यांनी विचारणा करावी, असे ते म्हणाले. दरम्यान, काँग्रेसचे प्रदेशाध्यक्ष हर्षवर्धन सपकाळ यांनी शिंदे पिता-पुत्रांना अटक करण्याची मागणी केल्याबाबत विचारले असता, जरांगे यांनी कोणतीही घाई न करता अत्यंत सावध पवित्रा घेतला. "आरोपांवरून लगेच कुणाला अटक करू नका; आधी निष्पक्ष तपास होऊ द्या, सत्य बाहेर येऊ द्या आणि चौकशीच्या निष्कर्षांवरच कारवाई ठरवा," असे सांगत त्यांनी तपासाला प्राधान्य दिले.
